( اسأل مجرب ) حاجات كنت اتمنى اعرفها قبل دخول الجامعة (الجزء الاول )

بسم الله الرحمن الرحيم

من اول ما دخلت الكلية وكل حاجة غلط وقعت فيها اثرت اكيد كتير على دراستي وعلى خطواتي اللي كنت حطاها لنفسي اني انجح فيها وتعثرت كتير ولسه بتعثر وكل مرة بتعثر فيها اتعلمت فيها درس . كل درس اتعلمته بقول لو كنت اعرفه قبل ما ادخل الكلية كان اكيد فرق كتير . عشان كدا قررت اكتب كل حاجة كان نفسي اني اكون على دراية بيها قبل دخولي الكلية :)

1- النية :

دايما كنت بناخد الحديث القدسي في المدرسة (انما الاعمال بالنيات ولكل امرئ ما نوى ) ونقعد نكرره  كتير ومش فاهمين حاجة او ممكن فاهمين بس مش بنربطه بحياتنا . كانت اول مرة اعرف النية يعني ايه بالظبط لما اشتركت في جمعيات خيرية وكانوا دايما بيقولوا ( جددوا النية ) ولما سألت البنات يعني ايه اجدد النية قالولي يعني تفكري نفسك انتي بتعملي كدا ليه وانه لربنا مش رياء او كدا فالمهم ارتبطت عندي النية شويا بموضوع الاعمال الخيرية . بس بعدها لما دخلت الكلية واتصدمت بنظام التعليم الصدمة الطبيعية لأي طالب داخل الجامعة ومفكر انه دخل الجنة . ومرة في برنامج مصطفى حسني سمعته بيقول ان الانسان المسلم المفروض ياخد نيه في كل حاجة في حياته يعني مثلا الطالب اذا اخد نيه وهو رايح الكلية انه بيتعلم عشان ينفع امته عشان ينجح ويدخل السرور على قلب ابوه وامه .... ونيات كتير اوي من بس خطوة اننا رايحين الكلية بتخلي الانسان بياخد حسنات طول الوقت اللي بيقضيه في الكلية حتى لو انت مأخدتش حاجة اليوم ده ... النية مش بس ثواب انت بجد بتفكر نفسك كدا انت رايح ليه وبتعمل كدا ليه , بتخليك تروح الكلية او المدرسة بنفسية مختلفة انك فعلا انسان بتعمل حاجة
انا مش بس كنت اتمنى اعرف اني لازم اخد نيه قبل كل حاجة بعملها قبل الكلية انا كنت اتمنى اعرفها من اول ما وعيت على الدنيا تقريبا :) .


2- اليوتيوب :D

بتمنى اني كنت ابقى من مسخدمين اليوتيوب بصفة مستمرة قبل مرحلة الجامعة لأني فعلا لما بدأت استخدمه فرق معايا كتير جداااااااااا وخلاني ابدأ اشوف العالم اصلا . من غير مقدمات كتير خلينا ندخل على المفيد على طول

1- حلقات خواطر جميع المواسم

من اوائل الحاجات اللي افدتني لما بدأت استعمل اليوتيوب كان اني اتفرج على حلقات خواطر كلها من البداية كل المواسم انا قبل كدا اتفرجت على التلفزيون على حلقات بس مش بانتظام وفي حاجة مهمة اوي في النت عن التلفزيون , انك اولا بتتفرج من غير فواصل اعلانية وده اهم حاجة . ثانيا انك بتبقى داخل وبتدور بنفسك على الحلقة فبيبقى عندك الشغف من قبلها انك تسمع فبالتالي بتبقى مركز جدا جدا في كل حاجة بتتقال

ايه فوايد انك تتفرج على خواطر ؟

انا اول ما بدأت استعمل اليوتيوب كنت في سنة تانية في الكلية كنت الى حد ما تايهة جدا ومش عارفة ايه التخصص اللي انا عوزاه وفي حوليا كتير قدي وبحس ان هما على دراية بحاجات كتير وانا لأ . طيب اشمعن انا ؟؟

1- لما بتتفرج على خواطر بمواسمه المختلفة بتحس انك بتلف العالم وانت قاعد في بيتك كمية المعلومات اللي بتطلع بيها من حلقة واحدة غير طبيعية . انت من كتر ما بتتفرج باستمرار على خواطر ودماغك طبعا على طول بتفكر بتبدأ يبقى عندك جديد في كل حاجة بتفكر بيجيلك افكار تطبقها حواليك من كتر الحاجات اللي شوفتها . واهم حاجة انك بتبقى ترتقي فكريا جدا وهتلاقي الفرق في شخصيتك كتير

2- حاول وانت بتتفرج على خواطر يبقى جنبك ورقة وقلم واكتب اي حاجة استوقفتك في الحلقة جملة اتقالت موقف حصل اي حاجة مش لازم حاجة يبقى كل الناس متفقة عليها في الحلقة ممكن انت اللي يأثر فيك غير الي يأثر في صاحبك مثلا . اكتب اي فكرة هتجيلك من الحلقة اللي شوفتها . ممكن مش تطبقها في ساعتها بس صدقني هتحتاجها في يوم من الايام

3- مهمة اوي اوي عشان بجد تستفاد من اانك تتفرج على خواطر ومن رأيي كل حاجة بتعرض حاجات في الغرب ياريت نغير النظرة اللي بنشوف بيها الحاجات دي , بمعنى اني ممكن اتفرج على الحلقات انبهر واقول هما فييين واحنا فييييييييييين عمرنا ما هنبقى زيهم وزي ما اتفرج زي ما اتفرجتش مفرقتش كتير . انما لو غيرت النظرة اني اتفرج بنية اني اشوف العالم ماشي ازاي ومن خلال الحلقات ممكن تجيلي فكره تغير واقع كتير حوليا ويغير في ناس حوليا . ممكن اكتشف اني كنت غلط في حاجة في تفكيري او الطريقة اللي بمارس بيها حياتي فأغيرها ومن ثم هيعود بنفع كتير اوي اوي ليا . وهكذا .....

نصيحة وانت بتستعمل اليوتيوب اعمل categories تحفظ فيها القنوات على حسب موضوعها عشان مش تضيع وقت وانت بتشوف حاجات مختلفة . كله هيتجمع في حتة واحدة وانت ومزاجك ..

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

صفحتي الشخصية على الفيس بوك :https://www.facebook.com/egyptiangirl2014