ليه اصلا نقلق ؟ ومن ايه ؟؟

(( تعمدت ان اختار صورة تبعث في النفس السكون ، وكثيرا ارتاح برؤية المناظر الطبيعية ))

تقريبا طول حياتي وانا شخصية قلوقة يعني بقلق كتير بس لما كبرت بقى الموضوع زايد اوي وبقى بيسرق مني لحظات كتير حلوة كنت المفروض استمتع بيها واعيشها بجد من غير قلق وكان لازم وقفة مع نفسي واشوف ليه انا بقلق والناس اللي بتقلق قلقانة من ايه؟؟

هل قلقانين من الغيب يعني اي حاجة في المستقبل طيب لو فكرنا هل قلقنا هيغير شئ ؟ هو اصلا الغيب بأيد مين بأيد ربنا يعني لما الانسان بيقلق من المستقبل كأنه قلقان من تدبير ربنا ليه مع ان ده عكس سنة ربنا في الكون ازاي اقلق من اللي ربنا كاتبهولي !!! ربنا قال في حديث ققدسي ( انا عن ظن عبدي بي فليظن بي ماشاء ) 

هل قلقانين من البشر ؟؟ قلقان ان شخص يأذيك مثلا او شخص معاك كويس دلوقتي بكره ميبقاش كويس . زي واحدة تقلق ان جوزها بيحبها دلوقتي وهي خايفة بكره يخونها او مشاعره تتغير من ناحيتها .

وايه اللي بيخلينا قلقانيين اصلا اتجاه حاجة معينة ؟؟ يعني هل الست دي شايفة ان جوزها انسان مش كويس بالعكس ممكن يبقى كويس جدا وبيحبها ؟؟ هل الشخص اللي قلقان انه يتخرج ميشتغلش ويقعد على القهوة او يروح يشتغل بياع في محل زيه زي معظم الشباب بصرف النظر عن مؤهله مع ان ممكن يكون هو شخص مجتهد وذكي واذا ركز اكتر واشتغل على نفسه ربنا اكيد هيرزقه بشغل كويس واذا فعلا توكل على الله حق توكله

احنا لما نفكر في اغلب الحاجات اللي بتقلقنا هنلاقيها حاجات مش موجودة حالة خوف وقلق من مجهول مش عارف اصلا تحدده لدرجة اني في مرة قررت اني اتغلب على قلقي تجاه شئ معين وقررت اعمل كل حاجة تخليني ابطل اقلق ولما بطلت اقلق تجاه الشئ الاولاني لاقيت نفسي افتكرت حاجة تانية قلقتني برده !!! طيب ليه ؟

الاجابة 1-اننا بنسيب نفسنا للشيطان كتير اوي اوي اوي يوسوسلنا ويخلي مخنا يودي ويجيب وياما تعصي ربنا يا اما يخليك متقومش بفريضة الوقت وهي انك تعمل المطلوب منك في الوقت اللي ربنا اراده زي انك تكون طالب فواجبك دلوقتي انك تذاكر وتجتهد ورغم ان ممكن يكون قدامك اكتر من سنة على ما تتخرج تلاقيه شغلك بانك لما تتخرج مش هتشتغل وتلاقي نفسك مش طايق المذاكرة ولا اي حاجة وبتضيع في وقتك وبس !!

2- البعد عن ربنا بيجيب كل الامراض النفسية اللي في الدنيا ( خوف - قلق - رهبة من اقل الاشياء - وسواس -ضعف ) طيب ليه ؟ ليه احنا كبشر بنستنى ان في حاجة كبيرة تحصل في حياتنا عشان نتغير ونقرب من ربنا . عشان نحس بالنعم اللي غرقانين فيها ومش حاسين ؟قد ايه الانسان القريب من ربنا وليه حال كدا مع ربنا بيحس انه في قصر حتى لو عايش في اوضة صغيرة . بيوصل لمعنى ((السلام النفسي )) بجد وبيحسه . كل واحد فينا محتاج ان هو يفكر في النعم اللي بيتعامل معاها كأنها حاجة عادية بس هي بجد نعمة كبيرة اوي . يفكر ازاي يقرب من ربنا بجد

3- احنا اشخاص مختلفة عمر ما قصة حياة حد هيعيشها حد تاني !! يعني فلان اللي اتخرج ملاقاش شغل وبعدين شرب مخدرات وبعدين مات دي مش قصة كل اللي هيتخرج هيحصله كدا ! مش معقول كمية التأثر بالحكايات المتشاءمة بس . مش معقول ان شخص اتخرج وهو كويس وقريب من ربنا جدا وبيجتهد وعامل اللي عليه وفجأة حصله كدا !! ليه مش بنبص للناس الكويسة ؟ ليه اصلا مش بنركز على نفسنا وبس ونعمل كل اللي نقدر عليه وكله في الاول والاخر على الله 

4- القلق  الايجابي نعمة : ايوا نعمة لأن القلق لما بيبقى صغير وفي بدايته بيخلينا نحترس وناخد كل حذرنا ونشتغل اكتر ، زي اللي قلقان انه يتخرج ميشتغلش القلق الايجابي انه يبدأ ياخد بكل الاسباب ويشتغل على نفسه اكتر مثلا انه يبدأ يشوف الشركات بتطلب مهارات ايه ويبدأ ياخد كورسات سواء على النت او بفلوس ويتعلم اكتر واكتر عشان لما يتخرج ان شاء الله يلاقي شغل

في الاخر انا عاوزة اقول ان القلق مش بيحل شئ والقلق لو مقدرناش نوقفه وكان عندنا وعي ان القلق ده مش هيخلينا نتقدم في حياتنا بجد هيعدي الزمن وهنلاقي ان لحظات كتير كان المفروض نعيشها صح معرفناش نعيشها ودايما فكر نفسك ( كل حاجة هتبقى كويسة ان شاء الله :) والحياة هتستمر :)

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

صفحتي الشخصية على الفيس بوك : https://www.facebook.com/egyptiangirl2014/timeline