ازاي تبدأ حياة صحية ؟؟؟

هتكلم انهارده عن اسلوب الحياة الصحي اللي بقى في توجه كبير ناحيته دلوقتي و وعي بالموضوع وده شئ كويس جدا ، بس للأسف ان ظهر التوجه ده بعد ما الممارسات الحاطئة ترسخت في ذهن الناس وانتشرت الامراض بشكل غريب وظهرت امراض مكناش نسمع عنها اصلا . الجو ملوث والاغلب الخضروات والفاكهة مرشوشة بمبيدات ، بقى في انتشار غريب للفاست فود في اماكن في كل شارع في محلين او تلاتة بيبيعوا اكل ، كل شويا يطلع حد يتكلم عن المطعم المشهور الفلاني وازاي عملية الطبخ واعداد الاكل للناس بتم جوا  واشياء في منتهى القرف :(

خلونا نبدأ بحاجات بسيطة جدااااااا بس هتفرق كتير اوي اوي في حياتك :-

1- لازم يبقى عندك رغبة انك تبدأ حياة صحية : ايوا قبل ما تعرف اي معلومة لازم تبقى عارف ان جسمك وصحتك نعمة من ربنا مش لازم نمرض عشان نحس بالنعمة لازم نحافظ عليها ، حتى لو كنت عاوز / عاوزة تخس/ي يبقى الهدف مش ان احنا نخس لأ الهدف ان صحتنا تبقى افضل ، مجهودنا يبقى احسن وافضل ، نتحرك بكل سهولة وسلالة ، لو انت عندك الرغبة هتلاقي نفسك بتبحث لوحدك في اسلوب الحياة الصحي والاكل الصحي وهتلاقي نفسك بدأت تنبه لحاجات مكنتش واخد بالك منها

2- ابسط حاجة تبدأ بيها انك تشرب مية كتيير اوي ، بلاش نحددها بلتر او لترين في اليوم ممكن تعمل كدا في الاول لو انت مش متعود انك تشرب مية خالص وبتنسى بعد كدا هتلاقي نفسك بتشرب كمية اكتر بكتيييييييييييييير من اللي انت كنت حاططتها لنفسك . وانت بتشرب المية حس وتخيل فوايدها ، تخيل وهي بتنقي جسمك وتذكر كل فوايدها .. عشان تعود نفسك انك تشرب مية اشربها في الوقت الصح عشان تستفيد منها اكتر .
كوباية ماية اول ما تصحى من النوم بتنشط الدورة الدموية وبتفوقك كتير وبتبدأ تنظم عملية الاخراج . كوباية مية قبل الاكل بتحسن الهضم وبتقلل من الكمية اللي بتاكلها للناس اللي بتخسس ، وكمان بتهيأ المعدة لاستقبال الاكل خاصة للناس اللي بتعاني من القاولون ( زيي :( ) لما بنبقى جاعنين اوي وبناكل مرة واحدة القاولون بنعاني منه جدا بس كوباية مية او اكتر قبل الاكل بتخفف الموضوع شويا لأن في حاجات تانية لازم تاخد بالنا منها هبقى اتكلم عنها بعدين .


3- خلينا نحطها قاعدة عشان ان نرتاح ( 99 % من الاكل اللي بره البيت غير صحي ) لو كان صحي في المكونات لو فرضنا يعني فعمره ما هيبقى صحي في الطريقة اللي بيتعمل بيها ، اي حاجة من المصنعات من شيبسي ، صودا ، بسكوت .... كلها بلا استثناء فيها مواد حافظة عشان تعيش مهما قالوا ان مفيهاش مواد حافظة فدي حاجة متتصدقش عشان لو مكنش فيها مواد حافظة مكنتش هتعيش الفترة دي كلها . بالاضافة للمصنعات اللي جواها والدهون والزيوت المهدرجة . ممكن نعمل سيرش بسيط عن اضرار الحاجات دي كلها

الصورة دي فيها اضرار الصودا بالذات لأنها اكتر شئ بلاحظ ان بقى في ادمان من ناحيته خاصة في وسط الشباب ، احنا كدا بندمر نفسنا بنفسنا

4- اتحرك على قد ما تقدر: اطلع السلم بدل الاسانسير ابدأها واحدة واحدة في الاول هتنهج لو انت مش متعود بعد كدا هتتعود ، على فكرة انا كنت بنهج لما بطلع السلم على طول لكن لما بطلت المصنعات بالذات مجهودي بقى افضل ومبقتش بنهج كتير زي الاول .
ابدأ خصص يوم في الاسبوع العب فيه 10 دقايق حتى او ربع ساعة . شوف حاجة انت بتحبها مش لازم تلعب الرياضة المعروفة اللي هي الكارديو لأأ لو بتحب تنط الحبل هتلاقي فيديوهات كتيييييير لنط الحبل وboxing وكمان Dance work out شوف الاختيارات واختار اللي يناسبك واللي بتستمع بيه .

* حب الرياضة مش عشان لازم العب عشان اخس مثلا . لأ العب الرياضة المناسبة ليك وحس الفرق بعد ما تلعب الرياضة وحبها عشان صحتك وعشان نفسك :)

5- عالج نفسك بنفسك : الاعشاب من اكتر الحاجات المظلومة لسبب غريب ان بقى يظهردلوقتي اعشاب متركبة وخلطة سريعة لعلاج مش عارف ايه وحاجات غريبة جدا ، مع ان الاعشاب من النباتات الطبيعية  اللي حولينا معروفة زي النعناع والقرفة والينسون والشمر والبابونج والحلبة و,,,,,,,,,,,,

لو نبحث في في فوايد كل نبات من النباتات دي هنذهل بجد من فوايدهم الغير محدودة مهما يتقال عن الفوايد بتطور الابحاث بعد كدا وبتظهر فوايد اكتر بكتييييييير من الاول .
حاول تشوف فوايد الاعشاب وازاي تستفيد بيها وايه اكتر عشب انت محتاجه ( انا شخصيا مدمنة نعناع وكمون لأنه كتير بيريح القاولون وبفضل الله لم اعد اعاني من آلام القاولون كالسابق )

وعن تجربة : اول ما تصحى من النوم كوباية مية سخنة + معلقة كبيرة عسل نحل + نص معلقة قرفة + ربع ملعقة زنجبيل او اقل ( الزنجبيل مفيد جدااااا في الشتا لأنه بيدفي جدا ) ودي بعض فوايد عن العسل والقرفة وفي فوايد اكتر من كدا بكتير

بالاضافة ان العسل بالقرفة مفيد جدا للناس اللي بتعاني من مشاكل في الركب بالذات ( ودي معلومة عرفتها من صفحة الدكتور مجدي يعقوب على الفيس بوك ومجربة )

5- ركز جدا على الخضار والفاكهة في اكلك : الفاكهة قبل الاكل مش بعده لأنها بتحسن من الهضم ولو اكلت الفاكهة بعد الاكل بتخن وسمعت دكتور بيقول انها بتعمل عفونة في البطن لكن مقرأتش المعلومة دي تاني  . ركز دايما ان اكلك يبقى فيه اللون الاخضر ، ايوا الاخضر زي الخيار والجرجير والسبانج والخس و ... ومرة سمعت دكتورة بتقول ان دايما خلي طبق السلطة يبقى فيه كل الالوان ، لما بتبص للألوان بتاعة الفاكهة والخضار ووتتأكلها هتحبها بجد سبحان الله جميلة جدا جدا . ابحث بنفسك عن فوايد الفاكهة والخضار وانت هتحبها .

ملحوظة :انا مش خبيرة تغذية مثلا وبنصح بالحاجات دي لأ انا انسانة عادية قررت اني ابدأ اسلوب حياة صحي وبدأته بالفعل وتحسنت كتيييييييييييييير وحبيت اني اشارك الخطوات اللي فادتني معاكم عشان تستفيدوا بيها )


ان شاء الله نكمل في مقال تاني عن اسلوب الحياة الصحي :)

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

صفحتي الشخصية على الفيس بوك :https://www.facebook.com/egyptiangirl2014/timeline