كل شئ يجري بمقادير

بنقابل كتير في حياتنا ناس ممكن تظلمنا او ناس متقدرناش ..

وساعات بنقابل ناس بسيبوا في حياتنا بصمة كبيرة مش لازم تبقى كويسة بس بيبقى لينا مواقف معاهم عمرنا ما ننساها وبيبقى درس كبير لينا

وكتير اوي بنفكر ان هي دي الحياة ، ايا كان طبيعة كل واحد فينا ، لكن وقت الصدمة او الموقف الصعب الانسان بيحس ان الحياة انتهت على كدا ، الجملة دي فيها الصح وفي الغلط ،الصح ان الحياة فعلا هتنتهي يوما ما والغلط ان دي مش نهاية الحياة ..

بسأل نفسي ليه بنربط نفسنا بأشخاص واحنا كلنا زائلين وكلنا حياتنا هتنتهي ، اجمل حقيقة في الدنيا انها هتنتهي ، اجمل قانون وضعه ربنا ان في يوم قيامة وكلنا هنتحاسب ، الحياة بتستمر مهما حصلنا .

قد ايه الانسان ضعيف وقد ايه كتير بيهين نفسه ! اه بيهين نفسه وكتير بيظلمها لما يقرر ويختار يبقى في وسط ناس مش بتقدره وناس بتظلمه وممكن هو يختار انه يفضل معاهم ، بيظلم نفسه يمكن عشان بيخاف من بكره !!

ساعات كتير بنخاف نخاطر بأشخاص ونخرجهم من حياتهم عشان مشاعرنا او مشاعرهم وكتير اوي بنيجيي على كرامتنا وفي الاخر احنا اللي بنتوجع ...
في مقولة قريتها مرة كل اما بفتكرها بحس اني اقوى ( خذوا الأمور بعزة انفس فكل شئ يجرب بمقادير )

متفكرش انك لما تستسلم او تتنازل عن حقك او تخاف هتأمن نفسك من اللي خايف انه يحصل ولا انك مش هتخسر شخص كنت متنازل عن حقوقك عشانه !! اذا القدر كاتب ان انتوا هتكملوا هتكملوا واذا كاتب ان انتوا مش هتكملوا مش هتكلموا ابدا .

كل شئ وليه نهاية وكل حاجة مكتوبة عن ربنا . الانسان مخير انه يختار هل هيؤثر كرامته واحترامه لذاته ولا هيتنازل ويهين نفسه ، لكن في الاخر اللي ربنا كاتبه هو اللي هيكون .

على قد ما في مواقف بنقابلها في حياتنا بتوجعنا وبتفضل سايبة اثر فينا إلا انها بتعلمنا كتير وبتصنع منا اشخاص مختلفين ، وممكن نختلف للأسوأ او للأحسن كل إنسان واختياره .

كتير بسأل نفسي ليه حصلي الموقف الفلاني ولو كنت استمريت في حياتي قبل ما يحصلي كذا او كذا ، لاقيت كذا اجابة اقتنعت بيها ان اولا مكنتش هتعلم اللي اتعلمته بعد ما مريت بالمواقف دي ، ثانيا الحياة كانت هتبقى مملة اوي لو ماشية على نفس المنوال على طول ، ثالثا وده الاهم ان لو محصلش حاجات تنغص على الانسان حياته الحياة مش هتبقى حياة كانت هتبقى جنة .

فكرت كتير هل الانسان السعيد كل حياته مثالية وجميلة عشان كدا سعيد ولا عادي حياته زينا في حاجات فيها تدايق وتجرح بس هو اختار انه يبقى سعيد ؟؟ هتكلم عننا احنا كمسلمين في آية في القرآن بتقول (احسب الناس ان يقولوا امنا وهم لا يفتنون ) الحياة كلها قتنة ومفيش حد ابدا بيبقى مرتاح في حياته ، لكن في منا بيقرر يرضى ولما بيرضى بيبقى اقوى ولما بيبقى اقوى بيجيي وقت الفتنة وبيبقى اقوى منها وربنا بيرزقه الرضا اكتر والسعادة ، وفي منا بيسخط على كل شئ ولما بيفتن بيسخط اكتر واكتر فبيبقى مش مرتاح.
الدنيا مفيهاش سعادة مطلقة ولا راحة مطلقة ولا اي حاجة مطلقة ، هو بس احنا هنتعامل مع المواقف ازاي واصلا كنا مستعدين ليها ازاي ؟؟؟

كل حاجة ليها نهاية......

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

صفحتي الشخصية على الفيس بوك :https://www.facebook.com/egyptiangirl2014/info?tab=page_info&edited=name