الملتفت لا يصل

تخيل في يوم كنت نازل تتمشى عشان زهقان شويا من البيت ، نزلت لاقيت حد دايقك في الشارع ، التصرف الطبيعي بما انك اصلا معندكش حاجة نازلها فانت هتتخانق معاه واحتمال كبير تدايق من الخروجة كلها وتطلع بيتكم تاني ..

نفس اليوم بنفس الشخص اللي دايقك في الشارع لكن انت نازل رايح مشوار مهم جدا مرتبط بمستقبلك زي مقابلة عمل مثلا ومستعد ومهيأ نفسك من كل النواحي لكن شاء القدر انك قابلت الشخص ده ، هل هتقف وتعطل نفسك وتتخانق معاه ؟؟ هل هتدايق من المقابلة اللي رايحها دي وتقول خلاص مش رايح هو يوم نحس من اوله ؟؟ الاجابة هي لأ ، كل ما زادت درجة تعلقك بالوظيفة اللي انت رايح تقدملها او المشوار اللي انت نازل عشانه كل ما هيقل تركيزك مع الشخص اللي دايقك وممكن اصلا تبصله كدا وتفتكر على طول مشوارك وتدير وشك وتمشي وكل ده يحصل في اقل من نص دقيقة .

اقصد ايه بالمثل ده؟ اقصد ان هي دي حياتنا بالظبط ، بنلاقي اشخاص كتير بدايقنا في يومنا عادي من مواقف مستفزة ، رد فعل مش متوقع ، او حاجة كبيرة زي صدمة في شخص ما .... الخ الخ الخ ( اصل الامثلة كتير اوي ) ، خاصة في مصر . الناس مبقتش رايقة زي زمان كل واحد شايل هموم الدنيا في اللي عنده حق واللي عامل نفسه مهموم (بيدور على الغم يعني ) .

لو كل واحد مكنش عند المشوار اللي عايش حياته عشان يوصله هيقف مع كل حاجة بتحصله ، والمقصود بالمشوار هنا هو هدفه ، الحاجة اللي عايش عشانها ، ساعتها مش هيلاقي وقت يبص لحد يدايقه ، ولو موقف كبير او صدمة مش هيسمح لنفسه ان الصدمة دي تأثر فيه او توقفه عن المشوار اللي رايحله بالعكس هيستوعب الموقف ويبص لنص الكوباية المليان جايز يستفيد من التجربة حاجة تخليه يوصل مشواره اسرع .

الحاجات اللي تدايق وتعكر صفو اي انسان طبيعي وتكئب كمان كلها موجودة ، لكن في الاول والاخر انت مصفة تقدر تعدي كل اللي انت عاوزه ، باختيارنا نقدر نتحكم في حياتنا ، بس محتاجين نتنازل شويا عن دور الضحية ، الناس اللي نجحت قابلت ناس تدايقهم اكتر من الناس العادية بكتييير جدا ، لكن كان عندهم المصفة دي وكانت فتاحتها ضيقة جدا واللي ميعديش منها يترمى على طول

نصيحة عن تجرية : اول ما تدايق من حاجة بسيطة او حتى كبيرة اعمل الحاجات دي عشان متسمحلهاش تأثر عليك :

*اتوضا وصلي ركعتين لله وادعي ان ربنا يهديك ويرزقك الحكمة والتركيز في هدفك وحياتك

*احكي لحد بتثق فيه جداااااااااااااااااااا زي الاهل مثلا . ( بس حاول تخليها الاخر )

* اكتب ، كله ورقة وقلم واكتب كل حاجة في دماغك ، بكل الكلام اللي كنت عاوز تقوله للشخص التاني بكل مشاعرك وبعدها قطع الورقة وارميها ، مشاعرك وانفعالاتك هتقل بنسبة كبيرة جداااااا جدااا واحتمال كبير تلاقي نفسك هديت اوي اوي

دي خاطرة سريعة كدا جات في بالي ، وحاجات انا جربتها وفعلا نجحت معايا لأني من الاشخاص العصبية جدا ، اتمنى ان تصل الافادة ويتقبل الله منا .